ციკლოვკა

ფროილაინ ელენე — შესავალი ციკლოვკოლოგიაში

გამარჯობა, შემარყია ამ გოგომ. ელენემ... წუხელ დამირეკა. ჩემი სტუდენტობის მეგობარია, ციკლოვკის გაკეთებას აპირებს საკუთარი ხელით 150 კვადრატზე. წარმოგიდგენია? ქმარს დასცილდა და მგონი აღარ იცის საით მიმართოს მოზღვავებული ენერგია.

ბაბუამისის დაგებული პარკეტი აქვს სახლში. მიცეკვია ამ პარკეტზე სტუდენტობისას და მიწმენდია მეორე დღეს. გოგოები ვიკრიბებოდით ხოლმე, უშუქობა რომ იყო და ქვეყანა იქცეოდა. რადიო გვქონდა ელემენტებზე. თეთრად ვათენებდით. გვიხაროდა ახალგაზრდობა და ცხოვრება.

ახლა ჩემი ძვირფასი ფროილაინ ელენე მოწადინებულია ხელოსნის გარეშე გააკეთოს 150 კვადრატზე ციკლოვკა (ციკლოვკას ვამბობ, მოხვეწა არის მგონი ქართული სიტყვა, ხან ერთს გამოვიყენებ, ხან მეორეს).

ჰოდა სხვას ვის, თუ არა მე მომადგა. იცის, რომ მთელი ცხოვრება რემონტებში ვარ. შეკეთება, გადაკეთება, ავეჯისთვის ადგილის და ფუნქციის შეცვლა ჩემი სისუსტეა. აქ კი უნდა გამოგიტყდე: იატაკის მოხვეწა ჩემთვისაც ახალი ხილია, თუმცა უარს ვერ ვეტყვი ელენეს. უნდა დავეხმარო. ჩაერთვები შენც? ნელ-ნელა დეტალებში გავერკვიოთ და შემდეგ ციკლოვკოლოგიაში დისერტაციაზეც ვიფიქროთ.

ციკლოვკის თეორია

სამეცნიერო ხარისხისთვის თეორია გვჭირდება, მცირედი მაინც. ინფორმაციის მოძიების პირველი წყარო თანამედროვე სამყაროში ინტერნეტია. საინტერესოა რას ამბობს ქართული ვიკიპედია ტერმინზე „მოხვეწა“. ვეძებთ და ჩამიჩუმი არ ისმის. როგორც ჩანს, ციკლოვკამდე ჯერ არ მისულან ქართველი ვიკიავტორები.

ჩაი მიირთვი, გაგიცივდება. დღეს ჩაი-ფართი მოვიწყოთ.

ხომ გემრიელია? ახლა მივყვეთ თანამიმდევრობით ციკლოვკის ამბავს.

შეიძლება თუ არა ყველა პარკეტს გაუკეთდეს ციკლოვკა?

არა. ციკლოვკის დროს პარკეტი თხელდება, ამიტომ მოხვეწა უსასრულოდ არ შეიძლება. პარკეტი რომ მოვხვეწოთ, მას უნდა ჰქონდეს ამის რესურსი — ანუ საკმარისი მუშა სისქე პარკეტის ღარიდან (ე.წ. „შიპიდან“) მის ზედაპირამდე.

• ციკლოვკის შედეგად პარკეტი საშუალოდ 0.5 მმ-დან 1 მმ-მდე თხელდება. ამიტომ, თუ გვსურს პარკეტი დიდხანს გვემსახუროს, წამდაუწუმ არ უნდა ვაციკლოვკოთ. მაგალითად, მასიური მუხის პარკეტი უძლებს 5–7 მოხვეწას, ხოლო საინჟინრო (სამშრიანი) პარკეტი — საშუალოდ 2–4-ჯერ.
• მეორე მიზეზი, რის გამოც პარკეტს ციკლოვკა ვერ გაუკეთდება, არის შემთხვევა, როცა პარკეტი ამოვარდნილია, დამპალია ან ყანყალებს. ამ შემთხვევაში იატაკი ჯერ უნდა გამაგრდეს ან დაზიანებული ფიცრები ჩანაცვლდეს.

ფროილაინ ელენეს პარკეტი ამ კუთხით ჯერ კიდევ ფორმაშია — ციკლოვკის გაკეთება შესაძლებელია.

ციკლოვკა საკუთარი ხელით?

შეუძლებელი არაფერია, თუმცა გამოგიტყდები: არ მესმის, რატომ უნდა გინდოდეს თავად აკეთო სახლში ციკლოვკა, მით უმეტეს ქალმა. ერთადერთი გამართლება ალბათ ის არის, რომ არ გაქვს საკმარისი თანხა ხელოსნისთვის და ამის პარალელურად გაფუჭებული იატაკი ძალიან გიშლის ნერვებს. ფროილაინს ფული ნამდვილად აქვს, მაგრამ რომ აიჩემებს რამეს, ვერ გადაათქმევინებ.

მთავარი პრინციპია: იატაკი კარგად უნდა მოიშქურკოს — მოზუმფარდეს. შქურკას ქართულად ზუმფარა ჰქვია. გასათვალისწინებელია, რომ იატაკი თანაბრად უნდა მოზუმფარდეს, რათა ლაქის ან ზეთის წასმის შემდეგ ხეს ერთგვაროვანი, იდეალური ვიზუალი ჰქონდეს.

რა ხელსაწყოები გამოიყენება და რამდენი სახეობის ციკლოვკა არსებობს?

მოციკლოვკება ხდება სპეციალური ციკლოვკის დანადგარებით. საქართველოში აქტიურ მოხმარებაშია რუსული და გერმანული დანადგარები:

1. რუსულ ციკლოვკას ეძახიან 1 დანადგარით იატაკის დამუშავებას — ან საბჭოთა რუსული აპარატით, ან გერმანული ჰუმელით.
2. გერმანულ ციკლოვკას ეძახიან სრულ პროცესს, რომელიც ბოლოვდება გერმანული სამდისკიანი დანადგარით — ტრიოთი (Trio).

შეღებილი იატაკის მოხვეწა („კრასკიანი პოლი“)

სქელი ზეთის საღებავით შეღებილი იატაკის ციკლოვკა გაცილებით შრომატევადი პროცესია — საღებავი ხურდება, ეკრობა ზუმფარას და ხარჯიც იზრდება. ბევრი ხელოსანი საერთოდ უარს ამბობს ასეთ იატაკზე, ხოლო ვინც აკეთებს, განსხვავებული ტარიფით მუშაობს.

ასეთ შემთხვევაში იდეალურია ჰუმელის უხეში (მაგალითად, 12 ან 16 ნომერი) სპეციალური ზუმფარის გამოყენება, რომელიც საღებავს სწრაფად ხსნის ხის დაუზიანებლად.

იატაკს გაუჩნდა ღარები — რა გავაკეთოთ?

ციკლოვკის დროს პარკეტის ფიცრებს შორის წლების განმავლობაში დაგროვილი ჭუჭყი ამოიწმინდება და ნაპრალები უფრო თვალშისაცემი ხდება. ეს ღარები აუცილებლად უნდა შეივსოს სპეციალური ხის შპაკლით.

ჩვენს ამბავს რომ დავუბრუნდეთ...

ელენე ამბობდა: „ვიქირავოთ ციკლოვკის აპარატიო“. ვიდეოები დაუძებნია ინტერნეტში და თავი უკვე ციკლოვკის დედოფალი ეგონა. სხვა რა გზა გვქონდა, დავიწყეთ დარეკვა. აღმოჩნდა, რომ აპარატებს მხოლოდ გამოცდილ ხელოსნებზე აქირავებენ და ისიც ნაცნობებზე. ცოტათი გამიხარდა — იმედია გადაიფიქრებს ჩემი მეგობარი.

მეორე ვარიანტი იყო მცირე ზომის ხელის მანქანებით გაკეთება, მაგრამ 150 კვადრატზე ამის გაკეთება ელენესთვისაც ზედმეტი აღმოჩნდა.

საბოლოოდ გადავრჩით — დავურეკეთ ციკლოვკის ხელოსანს. თავაზიანი შეგვხვდა, მოვიდა გერმანული აპარატებით. გვითხრა: „ციკლოვკას მე გაგიკეთებთ, თქვენ უბრალოდ შეიარჩიეთ ლაქი გინდათ თუ ზეთიო“.

ციკლოვკა გველოდება. ძალიან მაინტერესებს რა გამოვა. ამ ამბავს ცალკე მოგიყვებით. სხვა გვერდებზეც შემოიხედეთ, ყველგან მინდა შევხვდეთ და ვისაუბროთ.

მადლობა, რომ ჩემთან იყავით. დროებით!

შენი ნინი 🌿